Herbalife-ын Фитнес Зөвлөх Монголд анх удаа зочлон ирэх үеэр бид түүнтэй уулзаж ярилцлаа. Бага наснаасаа эхлэн спортоор хичээллэж эхэлсэн тэрээр өдгөө олон улсын түвшинд фитнесийн зөвлөх, дасгалжуулагч болж, хүмүүсийн амьдралд эерэг өөрчлөлт авчрахыг зорин ажиллаж байна.

Сайн байна уу, Юун түрүүнд тантай танилцсандаа таатай байна. Та өөрийгөө товчхон танилцуулна уу?

Сайн байна уу, намайг Юрий Ивлев гэдэг. Би 6 настайгаасаа спортын ертөнцөд хөл тавьсан. Тэр цагаас хойш жил бүр өөрийгөө хөгжүүлж, мэдлэг туршлагаа бусдад түгээх зорилготойгоор ажиллаж байна. Фитнес бол миний зүрх сэтгэл, амьдралын утга учир болсон зүйл. Өнөө үед хүмүүсийг харахад эрч хүчгүй, эрүүл биш харагдах нь олширчээ. Энэ нь голчлон буруу хооллолт, идэвхгүй амьдралын хэв маягтай холбоотой. Тийм ч учраас би хүмүүст эрүүл, зөв дадал хэвшилтэй амьдрахад нь туслахыг зорьдог.

Фитнесээр хичээллэж, эрүүл амьдралын хэв маягтай болох замнал тань хэрхэн эхэлсэн бэ?

Би багаасаа л хөдөлгөөнтэй хүүхэд байсан. Ойр дотнын хүмүүс маань намайг одоо ч хөдөлгөөнтэй хэвээрээ байна гэдэг. Анх спорт болон “ballroom” бүжгээр хичээллэж эхэлсэн. Дараа нь акробатик, pole dance зэрэг биеийн хүч шаардсан төрлүүдээр хичээллэсэн. Зарим спортыг би 28–29 насандаа буюу харьцангуй хожуу хичээллэж эхэлсэн ч хэзээ ч шантраагүй. Харин ч эсрэгээрээ өөрийгөө сорьж, илүү ихийг сурч хөгжихийг хүсэж ирсэн.

Herbalife-тай анх яаж холбогдсон бэ?

Би нэгэн видео үзээд Herbalife-ын  фитнес зөвлөхийн сонгон шалгаруулалтад оролцож, мэргэжлийн түвшинд олон шалгуур үзүүлэлтүүдэд тэнцэж албан ёсны Фитнес Зөвлөх болж байсан. Миний ойр дотнын хүмүүс Herbalife-ын бүтээгдэхүүн хэрэглэдэг байсан тул Herbalife-д эргэлзэх зүйл огтхон ч байгаагүй. Herbalife-ын бүтээгдэхүүнийг өөрөө хэрэглэж эхэлснээс хойш хэдхэн хоногийн дараа л үр дүнгээ маш сайн өгч байсан. Herbalife-ын Фитнес Зөвлөх болсон минь амьдралдаа хийсэн хамгийн зөв алхмуудын нэг гэж би боддог. Учир нь надад зөвхөн Фитнес Зөвлөх төдийгүй, олон улсад өөрийнхөө туршлагаа хуваалцаж илтгэл тавьж, сургалт орох зэрэг мэдлэгээ бусдад хуваалцах боломжийг компани маань олгосон.

Та гишүүдээ хэрхэн урамшуулж, дэмждэг вэ?

Миний хандлага бол хүн төвтэй, уян хатан байх. Зарим дасгалжуулагч нар “хурдан хийгээрэй, сайн тэвчээрэй” гэж шаарддаг бол би тухайн хүний тухайн өдрийн биеийн болон сэтгэлзүйн байдалд тулгуурлан дасгалаа сонгодог. Хэрвээ тухайн хүн бэлэн биш байвал өөр дасгал сонгож болно шүү дээ. Би хэзээ ч хүчлэхгүй. Харин ч тэр хүний сэтгэл зүйг дэмжиж, өөрт нь тохирсон дасгалыг санал болгодог. Учир нь хүн бүрийн биеийн чадамж, сэтгэл зүй, зорилго өөр байдаг.

Юунаас хамгийн их урам зориг авдаг вэ?

Юуны түрүүнд өөрөөсөө. Миний дотоод итгэл, зорилго бол хамгийн хүчтэй мотиваци. Би өөрөө зорилгодоо үнэнч байж, тууштай байж чадвал бусдад ч гэсэн нөлөөлж чадна. Мөн намайг дагаж, надтай хамт дасгал хийж байгаа хүмүүсийн үр дүн, өөрчлөлт маш их урам өгдөг. Herbalife ч бас надад байнга урам өгдөг. Аялал, шинэ боломж, шинэ сорилт гээд л. Аялал, фитнес хоёрыг хослуулна гээд бод доо. Гоё байгаа биз.

Фитнес зөвлөх болоход ямар чадвартай байх ёстой гэж боддог вэ? Таны карьерын өсөлтөд Herbalife ямар дэмжлэг үзүүлдэг вэ?

Нэгдүгээрт, өргөн мэдлэгтэй байх хэрэгтэй. Зөвхөн дасгал заах бус, хоол тэжээл, биеийн нөхөн сэргээлт, булчин амраах арга, стресстэй тэмцэх, сэтгэлзүйн дэмжлэг үзүүлэх гэх мэт олон талын ойлголттой байх хэрэгтэй. Хоёрдугаарт, өөрөө үлгэр жишээ үзүүлдэг байх хэрэгтэй. Фитнес зөвлөх хүн гоё биегүй, үргэлж түргэн хоол иддэг байж болохгүй шүү дээ. Гуравдугаарт, мотивацтай, итгэл үнэмшилтэй байх. Яагаад гэвэл өөртөө итгэдэг хүн л бусдад итгэл төрүүлж чадна гэж би боддог. Herbalife надад маш олон боломжийг өгсөн. Өмнө нь би биеийн хөдөлгөөнд буюу дасгалдаа л төвлөрдөг байсан бол одоо өөрийнхөө мэдлэгийг бусдад хуваалцаж, хэн нэгэнд их бага хэмжээгээр нөлөөлөхийг зорьдог болсон.

Монголын тухай таны сэтгэгдэл?

Би Монголд анх удаа ирж байна. Маш гоё байна. Байгаль нь үнэхээр үзэсгэлэнтэй. Монголын нүүдэлчин ахуй, байгаль, тал нутаг, уул ус надад үнэхээр үзэсгэлэнтэй санагддаг. Playtime Наадам хотын гадна болж байгаа нь надад энэ гайхалтай байгальтай илүү ойртож танилцах боломжийг олгож, хэзээ ч мартагдахааргүй мэдрэмжийг өгсөн. 

Цаашид та нийгэмд ямар шинэчлэлт, өөрчлөлт хийхийг зорьж байна вэ?

Орчин үеийн нийгэмд хамгийн том асуудал бол буруу хооллолт, идэвхгүй байдал, стресс юм. Иймдээ ч би илүү олон хүнд эрүүл амьдрахын үнэ цэнийг ойлгуулж, тэдний амьдралд өөрчлөлт хийхийг хүсдэг.