CreativeMornings-ийн наймдугаар сарын “NOMAD” сэдэв нь Монголын уламжлалт нүүдэлчин соёлыг орчин үеийн дижитал нүүдэлчинтэй хослуулсан өвөрмөц илэрхийлэл юм.

CreativeMornings-ийн Улаанбаатар хотын салбараас энэхүү сэдвийг сонгон, хүүхдийн номын зургийн чиглэлээр мэргэшсэн, өнгө, түүх өгүүлэхүйн гайхамшгийг уран бүтээлдээ шингээдэг зураач Б.Энх-Оюуныг урьж, иллюстрацийг бүтээлгэжээ.

Б.Энх-Оюун нь байгаль, өдөр тутмын жижиг гайхамшгаас сэдэл аван бүтээлээ туурвидаг бөгөөд энэ удаад Монголчуудын баялаг нүүдэлчин ахуй соёлоос урам авч, шинэлэг санаагаа илэрхийлсэн байна.

Тэрээр энэхүү бүтээлээ “Монголчуудын нүүдэлчин ахуйн соёл маш баялаг. Малчид өвсний соргог, шимийн төлөө бүх эд зүйлээ тэмээнд ачин, шинэ нутаг руу нүүдэллэдэг. Энэ амьдралын хэв маяг надад уламжлалт нүүдэлчинг орчин үеийн дижитал нүүдэлчинтэй хослуулах санааг төрүүлсэн” хэмээн онцолжээ.

Дэлхийн 70 гаруй орны 250 гаруй хотод сар бүр зохион болдог CreativeMornings-ийн Улаанбаатар дахь салбарыг "Global Shapers Ulaanbaatar Hub" хариуцан ажилладаг бөгөөд сар бүрийн уулзалтыг үнэ төлбөргүй зохион байгуулдаг. Тус арга хэмжээ нь бүтээлч хүмүүсийг дэмжих, тэдний бүтээлч сэтгэлгээг хөгжүүлэх, хотын амьдралд шинэ өнгө нэмэх чухал ач холбогдолтой юм.

Everyone is creative 🎨